Barrio de San Pedro

O 17-S: o Zoco de San Pedro

bdesanpedro — Mon, 11 Sep 2017 14:39:10 +0000

Gustas de regatear? Encantache buscar e rebuscar até atopar esa prenda ou obxecto a prezo imbatible que leva o teu nome? Saberás facelo dun xeito diferente? Con outras normas?

Este é o desafío que propón o Zoco e os comercios que nel participan: descubrir novos xeitos de regatear e negociar o prezo para, por suposto, levar para casa algunha das mercadorías que ofrecen os comercios do barrio que participan nesta singular e divertida proposta.

Entre trato e trato, haberá sesión vermú, actuacións e algunha que outra sorpresa.

Será o Domingo 17 na Praza 8 de marzo de 11 a 20h, asi que non o perdas! e vai pensando estratexias para negociar e comprar! Quen dixo medo?

Nadal en San Pedro

bdesanpedro — Fri, 16 Dec 2016 08:00:47 +0000

Estamos xa case nos días de Nadal. Son xornadas de vacacións, encontros con familias e amizades. E tamén de compras. Lembra que nestas datas máis que nunca, é importante a calidade e o bo servizo e é nisto onde o comercio de proximidade ten o seu forte.

Para animarnos e para agradecer a fidelidade e preferencia da súa clientela durante todo o ano, moitos dos nosos comercios decidiron organizarse e premiarnos con cestas ateigadas cos seus produtos. Son tres enormes lotes con propostas e mercadorías moi variadas, pois así é o noso comercio. Hai de todo e para todos os gustos!

Cada vez que compres nun dos establecementos adheridos recibirás unha participación para o sorteo.

O sorteo terá lugar o día 3 de xaneiro nun pequeno acto que será as 16.30h na Praza 8 de marzo.

Xa sabes, cantas máis teñas, máis doado será que te toque!

Este venres, día de San Martiño, Magosto

bdesanpedro — Wed, 09 Nov 2016 15:55:55 +0000

Aínda que ás veces non o pareza, o outono xa está aquí. E con el chega o tempo dos paseos polo barrio, as castañas e o magosto.
O magosto do barrio, organizado pola asociación de comerciantes e hosteleiros, terá lugar este venres Día de San Martiño e se desenvolverá nas rúas de San Pedro e Concheiros. Haberá comercios ben preparados, música na rúa, maquillaxe para cativs e castañas (no final de Concheiros e na Pza 8 de Marzo).
Anotade:
Venres 11, de 20.30h á medianoite
Rúas de San Pedro e Concheiros
Que as crianzas queren maquillarse? chama a REYBLANC 981592241 e concerta unha cita.

Descubre o moito que o noso barrio ten que ofrecer en outono!

O Barrio en Festas

bdesanpedro — Wed, 29 Jun 2016 12:26:27 +0000

Un ano máis están aquí as festas do barrio que durarán ata o domingo. Son xornadas especiais, de convivencia, divertimento e alegría. Son días para recoñecer eses rincóns do noso barrio que non transitamos a cotío.

O programa é, coma sempre, amplo e ben diverso. Para todos e todas, pois sempre haberá algo que nos acomode.

Haberá tamén un tempo para disfrutar dos nosos negocios, que nestes días presentarán a súa mellor aparencia. O corredor San Pedro- Concheiros estará o sábado libre de tráfico rodado, cos negocios na rúa e con actividades para pasalo ben. Haberá tamén nesa xornada actividades noutros puntos do barrio, como a Pza da Angustia ou a Trisca, con programación específica ao longo de todo o día.

Descubre o moito que o barrio de San Pedro ten que ofrecer, tamén nestes días tan especiais!

E lembrade que a partir deste venres, haberá unha nova mobilidade no barrio, máis tranquila e pacífica; con rúas de tráfico restrinxido aos coches. Na web do Concello tendes toda a información.

Este sábado é a Feira da Primavera, ven a visitar o noso comercio

bdesanpedro — Thu, 28 Apr 2016 07:21:46 +0000

Este sábado 30 de abril, as nosas rúas comerciais vestiranse coas súas mellores galas, pecharanse ao tráfico e armaranse mil e un postos de artesanía. É a Feira da Primavera esa xornada especial na que todos e todas damos a benvida ao sol, aos días longos e as temperaturas cálidas.

No corredor comercial San Pedro-Concheiros, os comercios e establecementos de hostelaría sacarán o negocio á rúa e poderemos gozar dun completo programa con propostas para todos e todas.

Poderás elixir nunha amplísima oferta o presente máis acaído para a túa nai, ese complemento que tanto precisas ou, simplemente agasallarte con algo bonito, que sempre está ben darse unha alegría.

Todo desde as 11 da mañá ata a medianoite no Barrio de San Pedro. Agardamoste!

Aberto o prazo para anotarse á Feira da Primavera

bdesanpedro — Thu, 18 Feb 2016 20:41:17 +0000

O 30 de abril celebraremos no Barrio a Feira da Primavera. Será, como sabedes, unha xornada de feira, festa e convivencia veciñal.

A Comisión organizadora ven de abrir o prazo para solicitar un posto nesa feira; as persoas interesadas deberán facer a súa petición nesta páxina antes do día 8 de marzo.

Pódense solicitar 3 tipos de postos:

Posto de comida para consumo inmediato.
Posto de artesanía (inclúese comida en conserva).
Posto de asociacións e organizacións sen ánimo de lucro.

Dada a complexa organización de este evento e tendo en conta que todo vai baseado no traballo voluntario dunha pequena comisión, solicitade o voso prazo en tempo e forma.

12D: xornada de venda especial de Nadal. Programa

bdesanpedro — Fri, 11 Dec 2015 09:25:51 +0000

Mañá será o gran día. A Asociación de Comerciantes pechará a rúa de San Pedro e os establecementos desta rúa e de Concheiros agardan por vós.

Haberá espazo para xogar e pasear, comercios adornados coas súas mellores galas e un bo día de sol. Todo, a partir das 12h.

Tamén un completo programa de animación:

12h-14h: Obradoiros e actividades infantis na Praza de San Pedro
13.30-14.30h: roteiro de panxoliñas
16-20h: obradoiros e actividades infantís na Pza de San Pedro
16-18h: Concerto de THE GOOD WAY, no Cruceiro de San Pedro
18-19h: Concerto do trío ILOUBE, na Cruz de San Pedro
20.30-23.30: DJ JUANMAX, nos Concheiros.

E aínda haberá o Mercado da Estrela na Pza 8 de Marzo, a recollida de alimentos da Operación Quilo do CX Don Bosco, instalación da árbore de Nadal das Aghulhas..

Un programa ben completo para que todos e todas, neste día e ao longo do Nadal, disfrutemos facendo barrio.

O 12 de decembro, o comercio abre para tí

bdesanpedro — Tue, 08 Dec 2015 20:18:18 +0000

venda especial do 12 de decembro

Os días de Nadal son xornadas de lecer en familia, encontros coas amizades, paseos… tamén de comprar o que precisamos para nós e aqueles agasallos para as persoas que aprezamos.

Todas estas cousas poden facerse en clave de barrio; si tamén comprar porque os nosos establecementos comerciais son barrio e acudindo a eles contribuímos a fortalecer á nosa pequena comunidade.

Para axudarvos nas vosas compras pero tamén para agradecer a vosa fidelidade durante o ano, a Asociación de Comerciantes do Barrio de San Pedro organiza unha xornada especial de convivencia e de venda.

Será o próximo sábado día 12, do mediodía en adiante e terá lugar principalmente no corredor comercial San Pedro-Concheiros.

Así, con esta unha xornada especial daremos inicio ao tempo de Nadal e faremolo como acostumamos aquí: pecharase a rúa de San Pedro, haberá animación, ofertas especiais, traballos de urban knitting e algunha que outra sorpresa.

Unha grande oportunidade para xunt@s facer barrio, apoiando ao noso comercio e pasando un bo día na compaña de familia e amizades. Agardamosvos!

Venres 13, Magosto terrorífico no barrio

bdesanpedro — Fri, 16 Oct 2015 15:20:02 +0000

Esta semana temos un venres 13 e como estamos no mes dos Magostos, os Comerciantes do Barrio queren celebralo por todo o alto cunha festiña terrorífica.

A partir das 18h, pecharase a Rúa de San Pedro para poder pasear cun pouco de calma e diversos bares do corredor comercial San Pedro-Concheiros armarán na rúa trebellos para asar castañas e convidar á veciñanza e haberá música e troula ata a medianoite. É un novo concepto: o magosto difuso e esparexido polas dúas rúas.

O elemento temático é cousa d@s convidad@s, asi que vinde preparad@s e ataviad@s para a ocasión coas vosas mellores galas terroríficas. Axudaranvos diversas perruquerías e Centros de Estética que colaborarán co evento decorando os rostros de cativ@s e maiores; estarán sinalizadas, asi que buscadeas.

Quen dixo medo?

Para mellor pasar o outono, temos unha grande oferta de actividades

bdesanpedro — Wed, 16 Sep 2015 20:06:26 +0000

Xa case no outono, nada mellor que revisar a oferta de actividades culturais e formativas que temos no barrio. Son a mellor forma de aprender, disfrutar e pasar mellor os días que se aveciñan.

Academias e escolas de idiomas, artes escénicas, música ou novos formatos pero tamén actividades máis orientadas a xerar espazos de dinamización e coñecemento veciñal.

Nas redes sociais e nas webs das entidades e establecementos tendes toda a información.

Temos de todo e tamén nisto somos un barrio privilexiado, aproveitadeo!