Barrio de San Pedro » actividades

Venres 13, Magosto terrorífico no barrio

bdesanpedro — Fri, 16 Oct 2015 15:20:02 +0000

Esta semana temos un venres 13 e como estamos no mes dos Magostos, os Comerciantes do Barrio queren celebralo por todo o alto cunha festiña terrorífica.

A partir das 18h, pecharase a Rúa de San Pedro para poder pasear cun pouco de calma e diversos bares do corredor comercial San Pedro-Concheiros armarán na rúa trebellos para asar castañas e convidar á veciñanza e haberá música e troula ata a medianoite. É un novo concepto: o magosto difuso e esparexido polas dúas rúas.

O elemento temático é cousa d@s convidad@s, asi que vinde preparad@s e ataviad@s para a ocasión coas vosas mellores galas terroríficas. Axudaranvos diversas perruquerías e Centros de Estética que colaborarán co evento decorando os rostros de cativ@s e maiores; estarán sinalizadas, asi que buscadeas.

Quen dixo medo?

Para mellor pasar o outono, temos unha grande oferta de actividades

bdesanpedro — Wed, 16 Sep 2015 20:06:26 +0000

Xa case no outono, nada mellor que revisar a oferta de actividades culturais e formativas que temos no barrio. Son a mellor forma de aprender, disfrutar e pasar mellor os días que se aveciñan.

Academias e escolas de idiomas, artes escénicas, música ou novos formatos pero tamén actividades máis orientadas a xerar espazos de dinamización e coñecemento veciñal.

Nas redes sociais e nas webs das entidades e establecementos tendes toda a información.

Temos de todo e tamén nisto somos un barrio privilexiado, aproveitadeo!

Queres abrir un negocio no barrio? Diversificar o que xa tes?

bdesanpedro — Tue, 16 Jun 2015 07:11:45 +0000

Se estás pensando en abrir un negocio ou en diversificar o que xa tes, o sábado 27 haberá unha actividade pensada para tí.

Emprender en San Pedro. Emocións e solucións é o obradoiro que propón a Concellaría de Desenvolvemento Económico e Turismo, ao abeiro do Programa Urbana para ese día de 10 a 11.45h na Pza 8 de marzo.

Descubrirás a través de xogos como desenvolver, impulsar e potenciar as competencias e habilidades emocionais que ten todo emprendedor.

Tes toda a info na web municipal

Agardamoste!

Sábado 30 de maio, VI Mercado do Caracol

bdesanpedro — Fri, 22 May 2015 18:45:58 +0000

No Mercado do Caracol, veciños e veciñas achéganse coa súas casiñas ás costas á rúa do Home Santo para vender, regalar ou trocar o que lles sobra e atopar o que precisan.

Ao tempo, os negocios da Rúa do Home Santo teñen unha xornada especial de venda, porque queremos que descubrades esa rúa e o moito que ten que ofrecer.

Organizado pola AV A Xuntanza, Comerciantes da Rúa do Home Santo e a AC do Barrio de San Pedro, o Mercado ten lugar entre as 11 e as 14h e é unha oportunidade sensacional para facer algo de limpeza de trebellos ou atopar boas gangas e, como non, para pasar un bo rato en compañía de boa xente.

Agardamoste!

A Primavera chega a San Pedro este sábado

bdesanpedro — Thu, 30 Apr 2015 19:34:37 +0000

Un ano máis, puntual á súa cita, chega a Feira da Primavera. É unha xornada especial que nos fai xurdir do letargo e a invernía, un día para pasear, comprar e gozar xuntos da compañía da veciñanza, amizades e visitantes.

O barrio e os nosos negocios, máis que nunca, engalanaremonos -tanto como o tempo o permita- para tan especial xornada porque é agora -e nas festas- cando mellor nos proxectamos como barrio para vivir, traballar e comprar.

O programa é intenso, máis de 12 horas de actos para todos e todas. Haberá música, actividades organizadas por entidades do barrio, pasarrúas, sesión vermú coa querida xente de Xerock, divertimento para @s miúd@s, obradoiro de baile tradicional, serán familiar e pecharemos (especial deste ano) con concertos acústicos.

Grazas ao voluntariado, á veciñanza, aos establecementos colaboradores e ás entidades organizadoras, a AC Barrio San Pedro e a AV A Xuntanza.

Todos e todas, veciñanza e visitantes, estades convidad@s a compartir esta xornada tan especial!